Serat Anglingdarma
Pupuh I: Asmaradana



ꦥꦸꦂꦮꦏꦤ꧀ꦤꦶꦫꦩꦏꦶꦂꦠꦶꦫꦸꦩꦚ꧀ꦕꦤꦯꦁꦥꦸꦱ꧀ꦠꦏꦲꦶꦁꦲꦫꦶꦲꦁꦒꦫꦮꦒꦺꦲꦶꦁꦠꦁꦒꦭ꧀ꦏꦥꦶꦁꦥꦶꦠꦸꦭꦱ꧀‌ꦩꦸꦏꦫꦩ꧀ꦮꦸꦭꦤ꧀ꦤꦶꦫꦌꦲꦺꦱꦁꦏꦭꦥꦶꦤꦺꦠꦸꦁꦏꦺꦧ꧀ꦭꦠ꧀ꦕꦠꦸꦂꦔꦺꦰ꧀ꦛꦶꦤꦡ
1purwakanira makirti / rumancana sang pustaka / ing ari anggara wage / ing tanggal kaping pitulas / Mukaram wulanira / Ehe sangkala pinetung / keblat catur ngèsthi nata
ꦭꦏ꧀ꦱꦶꦠꦤ꧀ꦲꦶꦁꦏꦁꦮꦶꦤꦂꦤꦶꦏꦠꦤꦶꦫꦺꦁꦪꦸꦒꦧꦸꦢꦤꦸꦁꦱ꧀ꦮꦗꦮꦥꦶꦠꦸꦠꦸꦂꦫꦺꦤꦢꦾꦤ꧀ꦧꦸꦢꦪꦺꦤ꧀ꦲꦸꦠꦩꦭꦶꦤꦸꦫꦶꦏꦁꦕꦫꦶꦠꦢꦸꦏ꧀ꦗꦼꦤ꧀ꦤꦼꦁꦔꦶꦫꦲꦶꦁꦢꦔꦸꦩꦲꦫꦗꦲꦁꦔ꧀ꦭꦶꦁꦢꦂꦩ
2laksitan ingkang winarni / katanirèng Yugabuda / nuswa Jawa pituture / nadyan Buda yèn utama / linuri kang carita / duk jênêngira ing dangu / Maharaja Anglingdarma
ꦠꦤ꧀ꦤꦤꦏꦁꦚꦶꦚꦶꦫꦶꦁꦔꦶꦏꦧꦼꦤ꧀ꦠꦫꦤ꧀ꦤꦶꦫꦟꦡꦠꦿꦶꦧꦸꦮꦟꦏꦼꦏꦼꦱ꧀ꦏꦧꦺꦃꦫꦡꦸꦮꦶꦤ꧀ꦤꦺꦴꦁꦲꦶꦁꦗꦮꦡꦏꦶꦤ꧀ꦤꦠꦸꦗꦺꦴꦤ꧀ꦱꦏꦂꦰꦠꦸꦲꦸꦏꦭꦩꦸꦤ꧀ꦥꦶꦤꦸꦚ꧀ꦗꦸꦭ꧀‌ꦱꦶꦤꦼꦧꦸꦠ꧀ꦤꦡꦨꦛꦫ
3tan ana kang nyênyiringi / kabêntaranira nata / tri buwana kêkês kabèh / ratu winong ing jawata / kinatujon sakarsa / tuhu kalamun pinunjul / sinêbut nata bathara
ꦥꦿꦗꦤ꧀ꦤꦫꦯꦿꦶꦧꦸꦦꦡꦶꦲꦶꦁꦔꦫꦤ꧀ꦩꦭꦮꦥꦠꦾꦭꦁꦏꦸꦁꦮꦶꦪꦂꦗꦗꦃꦲꦤ꧀ꦤꦺꦲꦔꦸꦁꦏꦸꦂꦫꦏꦼꦤ꧀ꦲꦭ꧀ꦢꦏꦔꦗꦼꦁꦔꦏꦼꦤ꧀ꦩꦸꦲꦫꦠꦸꦭꦸꦱ꧀ꦏꦁꦱꦂꦮꦠꦶꦤꦤ꧀ꦢꦸꦂꦲꦺꦕꦩꦤ꧀ꦤꦃꦲꦶꦁꦏꦮꦸꦭ
4prajanira sri bupati / ingaran Malawapatya / langkung wiyar jajahane / angungkurakên aldaka / ngajêngakên muara / tulus kang sarwa tinandur / eca manahing kawula
ꦫꦢꦾꦲꦶꦁꦩꦭꦮꦥꦠꦶꦩꦠꦾꦤ꧀ꦠꦒꦼꦩꦃꦫꦃꦲꦂꦗꦏꦕꦫꦶꦠꦥꦸꦁꦒꦮꦤ꧀ꦤꦺꦝꦺꦴꦩꦱ꧀ꦱꦩꦾꦩ꧀ꦧꦼꦏ꧀ꦱꦸꦢꦶꦫꦥꦿꦮꦶꦫꦲꦶꦁꦔꦪꦸꦢꦩꦁꦒꦭꦥꦫꦒꦸꦭ꧀ꦭꦒꦸꦭ꧀‌ꦠꦠꦺꦲꦔꦼꦭꦂꦗꦗꦃꦲꦤ꧀
5radya ing Malawapati / matyanta gêmah raharja / kacarita punggawane / dhomas samyambêk sudira / prawira ing ayuda / manggala para gul-agul / tate angêlar jajahan
ꦮꦲꦸꦯꦁꦯꦿꦶꦤꦫꦦꦡꦶꦩꦲꦫꦗꦲꦁꦔ꧀ꦭꦶꦁꦢꦂꦩꦠꦤ꧀ꦏꦸꦕꦶꦮꦭꦶꦰ꧀ꦠꦾꦤ꧀ꦤꦺꦢꦶꦧꦾꦱꦼꦏ꧀ꦠꦶꦩꦺꦴꦟ꧀ꦢꦿꦒꦸꦤ꧀ꦤꦥꦿꦮꦶꦫꦏꦶꦤ꧀ꦤꦮꦱꦫꦩꦲꦶꦧꦸꦫꦗꦫꦡꦸꦲꦺꦪꦁꦟꦡꦥꦶꦤꦟ꧀ꦝꦶꦠ
6wau sang sri narapati / Maharaja Anglingdarma / tan kuciwa ing listyane / dibya sakti môndraguna / prawira kinawasa / rama ibu raja ratu / eyang nata pinandhita
ꦏꦢꦁꦱꦶꦤ꧀ꦤꦁꦔꦂꦪꦱꦩꦶꦫꦡꦸꦮꦶꦗꦶꦭ꧀ꦭꦶꦁꦔꦠꦥꦥꦭꦸꦤ꧀ꦠꦸꦂꦲꦤ꧀ꦢꦤꦮꦫꦺꦃꦉꦩ꧀ꦧꦼꦱ꧀ꦱꦶꦁꦩꦢꦶꦏꦸꦱꦸꦩꦩꦲꦫꦗꦁꦔ꧀ꦭꦶꦁꦢꦂꦩꦩꦏ꧀ꦱꦶꦃꦠꦫꦸꦤꦮꦂꦤꦤꦸꦁꦏꦢꦾꦧꦛꦫꦩꦂꦩꦠ
7Kadang sinangarya sami / ratu wijiling atapa / paluntur andanawarèh / rêmbêsing madu kusuma / Maharaja Nglingdarma / maksih taruna warna nung / kadya Bathara Marmata
ꦥꦼꦦꦡꦶꦃꦲꦶꦫꦟꦂꦦꦡꦶꦱꦤ꧀ꦠꦤꦮꦼꦏꦤ꧀ꦤꦶꦁꦮꦂꦒꦧꦛꦶꦏ꧀ꦩꦢꦿꦶꦩ꧀ꦥꦤ꧀ꦤꦼꦁꦔꦿꦤ꧀ꦤꦺꦢꦶꦧꦾꦱꦏ꧀ꦠꦶꦩꦺꦴꦟ꧀ꦢꦿꦒꦸꦤ꧀ꦤꦥꦿꦮꦶꦫꦔꦢꦶꦭꦒꦩꦂꦩꦤꦶꦫꦯꦁꦔꦦꦿꦨꦸꦲꦧꦭꦱꦱꦩꦺꦁꦫꦗ
8pêpatihira narpati / santana wêkaning warga / Bathikmadrim panêngrane / dibya sakti môndraguna / prawira ngadilaga / marmanira sang aprabu / abala sasamèng raja
ꦲꦶꦁꦒꦶꦃꦥꦠꦶꦃꦨꦛꦶꦏ꧀ꦩꦢꦿꦶꦩ꧀‌ꦲꦶꦁꦏꦁꦲꦔꦼꦭꦂꦗꦗꦃꦲꦤ꧀‌ꦥꦤꦽꦥ꧀ꦲꦶꦁꦪꦸꦢꦲꦤ꧀ꦠꦸꦏ꧀ꦏꦺꦢꦢꦾꦲꦤꦸꦁꦏꦸꦭ꧀ꦱꦢꦪꦏꦁꦥꦫꦫꦗꦫꦗꦱꦸꦩꦸꦪꦸꦢ꧀ꦠꦸꦂꦥꦸꦠꦿꦶꦤ꧀ꦤꦶꦥꦸꦤ꧀‌ꦱꦢꦪꦱꦩ꧀ꦥꦸꦤ꧀ꦏꦒꦂꦮ
9inggih Patih Bathikmadrim / ingkang angêlar jajahan / pinrêp ing yuda antuke / dadya anungkul sadaya / kang para raja-raja / sumuyud tur putrinipun / sadaya sampun kagarwa
꧑꧐ꦝꦺꦴꦩꦱ꧀ꦕꦕꦃꦲꦺꦥꦿꦥꦸꦠꦿꦶꦏꦁꦏꦠꦸꦂꦲꦶꦁꦯꦿꦶꦟꦫꦺꦟ꧀ꦢꦿꦕꦶꦠꦿꦤ꧀ꦤꦺꦱꦩꦾꦪꦸꦲꦤ꧀ꦤꦺꦴꦩ꧀‌ꦏꦶꦥꦠꦶꦃꦮꦸꦱ꧀ꦠꦶꦤ꧀ꦤꦫꦶꦩꦤ꧀‌ꦱꦤ꧀ꦠꦤꦤ꧀ꦤꦶꦁꦟꦫꦺꦟ꧀ꦢꦿꦏꦥꦽꦤ꧀ꦤꦃꦩꦶꦱꦤ꧀ꦤꦤ꧀ꦦꦿꦨꦸꦲꦪꦸꦲꦺꦤ꧀ꦢꦃꦮꦂꦤꦤ꧀ꦤꦫ
10dhomas cacahe pra putri / kang katur ing sri narendra / citrane samyayu anom / ki patih wus tinariman / santananing narendra / kaprênah misanan prabu / ayu endah warnanira
꧑꧑ꦮꦱ꧀ꦠꦢꦺꦮꦶꦉꦁꦒꦮꦠꦶꦲꦢꦂꦧꦺꦲꦫꦶꦱꦗꦸꦒꦗꦭꦸꦲꦥꦼꦏꦶꦏ꧀ꦮꦂꦤꦤ꧀ꦤꦺꦱꦩ꧀ꦥꦸꦤ꧀ꦏꦶꦤꦸꦭꦮꦶꦱꦸꦝꦗꦶꦤ꧀ꦤꦼꦤ꧀ꦤꦼꦁꦏꦼꦤ꧀ꦥꦸꦁꦒꦮꦫꦺꦴꦁꦔꦺꦮꦸꦭꦸꦭꦸꦁꦒꦸꦃꦲꦶꦥꦸꦤ꧀‌ꦲꦫꦤ꧀ꦲꦂꦪꦮꦶꦗꦤ꧀ꦤꦂꦏ
11wasta Dèwi Rênggawati / adarbe ari sajuga / jalu apêkik warnane / sampun kinulawisuda / jinênêngkên punggawa / rongèwu lêlungguhipun / aran Arya Wijanarka
꧑꧒ꦕꦶꦤꦫꦶꦠꦧꦛꦶꦏ꧀ꦩꦢꦿꦶꦩ꧀‌ꦠꦸꦁꦒꦶꦭ꧀ꦥꦒꦸꦫꦺꦴꦤ꧀ꦭꦤ꧀ꦤꦡꦩꦶꦭꦏꦭꦁꦏꦸꦁꦱꦏ꧀ꦠꦶꦤꦺꦕꦶꦠꦿꦤ꧀ꦤꦺꦩꦶꦫꦶꦧ꧀ꦱꦁꦟꦡꦧꦒꦸꦱ꧀ꦥꦿꦮꦶꦫꦠꦿꦸꦤ꧀ꦤꦔꦶꦁꦏꦸꦕꦶꦮꦱ꧀ꦮꦫꦤ꧀ꦤꦶꦥꦸꦤ꧀‌ꦫꦒꦶꦥꦺꦭꦠ꧀ꦪꦺꦤ꧀ꦔꦤ꧀ꦢꦶꦏ
12cinarita Bathikmadrim / tunggil paguron lan nata / mila kalangkung saktine / citrane mirib sang nata / bagus prawira truna / nging kuciwa swaranipun / ragi pelat yèn ngandika
꧑꧓ꦱꦺꦴꦒꦠꦤ꧀ꦤꦶꦫꦺꦁꦟꦂꦦꦡꦶꦟꦡꦦꦟ꧀ꦝꦶꦠꦱꦸꦢꦶꦧꦾꦲꦶꦁꦲꦂꦢꦶꦥꦝꦺꦥꦺꦴꦏ꧀ꦏꦤ꧀ꦤꦺꦮꦶꦤ꧀ꦤꦱ꧀ꦠꦤ꧀ꦲꦶꦁꦫꦱꦩꦭꦨꦓꦮꦤ꧀ꦩꦤꦶꦏ꧀ꦱꦸꦠꦿꦪꦺꦏꦸꦗꦸꦭꦸꦏ꧀ꦏꦺꦯꦁꦮꦶꦏꦸꦱꦩ꧀ꦥꦸꦤ꧀ꦲꦩꦶꦟ꧀ꦝꦤꦶꦱ꧀ꦏꦭ
13sogatanirang narpati / nata pandhita sudibya / ing ardi padhepokane / winastan ing Rasamala / Bagawan Maniksutra / yèku juluke sang wiku / sampun amindha niskala
꧑꧔ꦲꦢꦂꦧꦺꦥꦸꦠꦿꦱꦱꦶꦏꦶꦱꦶꦫꦱꦁꦩꦲꦥꦤ꧀ꦝꦶꦠꦢꦺꦮꦶꦱꦼꦠꦾꦥꦤ꧀ꦤꦼꦁꦔꦿꦤ꧀ꦤꦺꦗꦼꦗꦸꦭꦸꦏ꧀ꦲꦩ꧀ꦧꦫꦮꦠꦾꦲꦺꦤ꧀ꦢꦃꦢꦠꦤ꧀ꦥꦱꦩꦱꦩꦶꦲꦺꦱ꧀ꦠꦿꦶꦊꦁꦊꦁꦩꦔꦸꦲꦸꦩꦶꦪꦠ꧀ꦲꦶꦁꦱꦁꦏꦸꦱꦸꦩ
14adarbe putra sasiki / sira sang maha pandhita / Dèwi Sêtya panêngrane / jêjuluk Ambarawatya / endah datanpa sama / sami èstri lênglêng mangu / umiyat ing sang kusuma
꧑꧕ꦭꦶꦫꦶꦁꦔꦺꦒꦭꦏ꧀ꦲꦩꦤ꧀ꦤꦶꦱ꧀‌ꦲꦱꦿꦶꦁꦏꦂꦪꦲꦼꦭꦲꦼꦭꦪꦺꦤ꧀ꦕꦶꦤꦺꦴꦤ꧀ꦢꦿꦱꦸꦮꦂꦤꦤ꧀ꦤꦺꦏꦸꦫꦁꦕꦺꦴꦤ꧀ꦢꦿꦭꦸꦮꦶꦃꦮꦂꦤꦤꦢꦾꦤ꧀ꦫꦠꦶꦃꦲꦶꦁꦱ꧀ꦮꦂꦒꦗꦶꦤ꧀ꦤꦗꦂꦫꦭꦤ꧀ꦱꦁꦔꦪꦸꦏꦟ꧀ꦝꦶꦃꦲꦠꦟ꧀ꦝꦶꦁꦔꦫꦫꦱ꧀
15liringe galak amanis / asri karya êla-êla / yèn cinôndra suwarnane / kurang côndra luwih warna / nadyan ratih ing swarga / jinajara lan sang ayu / kandhiha tandhing araras
꧑꧖ꦩꦶꦢꦼꦂꦫꦱꦱꦿꦟꦒꦫꦶꦔꦸꦭꦂꦫꦶꦩꦺꦴꦁꦱꦲꦤ꧀ꦠꦸꦏ꧀ꦏꦏꦁꦲꦸꦩꦶꦫꦶꦧ꧀ꦲꦶꦁꦕꦶꦠꦿꦤ꧀ꦤꦺꦗꦸꦮꦶꦠꦤ꧀ꦤꦶꦫꦺꦁꦔꦭ꧀ꦢꦏꦥꦸꦚ꧀ꦗꦸꦭ꧀ꦲꦶꦁꦠꦤꦃꦗꦮꦠꦤ꧀ꦲꦤꦲꦸꦥꦩꦶꦤ꧀ꦤꦶꦥꦸꦤ꧀‌ꦠꦸꦲꦸꦫꦡꦸꦤꦶꦁꦏꦸꦱꦸꦩ
16midêra sasra nagari / ngulari môngsa antuka / kang umirib ing citrane / juwitanirèng aldaka / punjul ing tanah Jawa / tan ana upaminipun / tuhu ratuning kusuma
꧑꧗ꦏꦕꦠꦸꦂꦯꦁꦭꦶꦂꦲꦥ꧀ꦱꦫꦶꦲꦶꦁꦔꦂꦒꦱꦩ꧀ꦥꦸꦤ꧀ꦲꦭꦩꦏꦒꦂꦮꦩꦫꦁꦯꦁꦏꦡꦺꦴꦁꦲꦁꦔ꧀ꦭꦶꦁꦢꦂꦩꦲꦶꦁꦩꦭꦮꦧꦶꦤꦏ꧀ꦠꦩꦫꦁꦥꦿꦗꦏꦶꦤꦂꦪꦒꦂꦮꦠꦼꦠꦸꦁꦒꦸꦭ꧀‌ꦩꦸꦩ꧀ꦥꦸꦤ꧀ꦤꦶꦲꦶꦁꦢꦊꦩ꧀ꦥꦸꦫ
17kacatur sang lir apsari / ing arga sampun alama / kagarwa marang Sang Katong / Anglingdarma ing Malawa / binakta marang praja / kinarya garwa têtunggul / mumpuni ing dalêm pura
꧑꧘ꦱꦏꦛꦃꦲꦺꦥꦫꦥꦸꦠꦿꦶꦒꦂꦮꦤ꧀ꦤꦺꦯꦿꦶꦟꦫꦟꦡꦱꦢꦪꦮꦸꦱ꧀ꦥꦝꦏꦫꦺꦃꦩꦫꦁꦏꦸꦱꦸꦩꦺꦁꦔꦭ꧀ꦢꦏꦔꦶꦁꦱ꧀ꦭꦩꦶꦤ꧀ꦤꦺꦏꦒꦂꦮꦢꦺꦫꦺꦁꦲꦕꦉꦩ꧀ꦱꦭꦸꦭꦸꦠ꧀‌ꦏꦭꦮꦤ꧀ꦱꦿꦶꦟꦫꦟꦡ
18sakathahe para putri / garwane sri naranata / sadaya wus padha karèh / marang kusumèng aldaka / nging slaminE kagarwa / dèrèng acarêm salulut / kalawan sri naranata
꧑꧙ꦫꦶꦯꦁꦏꦸꦱꦩꦤ꧀ꦤꦶꦁꦥꦸꦫꦶꦏꦼꦠꦂꦢꦕꦶꦩ꧀ꦧꦿꦸꦮꦤ꧀ꦤꦶꦫꦱꦭꦩꦶꦤ꧀ꦤꦺꦥꦥꦔꦤ꧀ꦠꦺꦤ꧀‌ꦢꦺꦫꦺꦁꦏꦺꦔꦶꦁꦱꦥꦺꦴꦕꦥ꧀ꦥꦤ꧀‌ꦥꦫꦥꦸꦠꦿꦶꦱꦢꦪꦠꦤ꧀ꦏꦼꦤ꧀ꦤꦕꦏꦼꦠ꧀ꦱꦁꦦꦿꦨꦸꦩꦶꦮꦃꦱꦼꦭꦶꦂꦥꦶꦥꦶꦔꦶꦠ꧀ꦠꦤ꧀
19risang kusumaning puri / kêtarda cimbruwanira / salamine pêpangantèn / dèrèng kenging sapocapan / para putri sadaya / tan kêna cakêt sang prabu / miwah sêlir pêpingitan
꧒꧐ꦏꦁꦏꦼꦤꦶꦩꦉꦏ꧀ꦱꦁꦔꦗꦶꦥꦫꦧꦧꦸꦠꦸꦮꦶꦤ꧀ꦲꦶꦚꦏꦁꦮꦪꦃꦲꦶꦫꦮꦸꦱ꧀ꦭꦸꦁꦱꦺꦲꦶꦁꦩꦁꦏꦺꦮꦸꦱ꧀ꦠꦶꦒꦁꦕꦺꦴꦤ꧀ꦢꦿꦢꦺꦤ꧀ꦚꦥꦁꦒꦶꦃꦯꦁꦟꦡꦲꦂꦢꦱꦸꦁꦏꦮꦤ꧀ꦤꦶꦁꦏꦭ꧀ꦧꦸꦲꦺꦚ꧀ꦗꦶꦁꦩꦶꦪꦺꦴꦱ꧀ꦱꦶꦤꦺꦮꦏ
20kang kêni marêk sang aji / para babu tuwin inya / kang wayahira wus lungse / ing mangke wus tigang côndra / dènnya panggih sang nata / arda sungkawaning kalbu / enjing miyos sinewaka
꧒꧑ꦠꦤ꧀ꦥꦩꦤ꧀ꦢꦫꦱꦁꦔꦗꦶꦩꦶꦮꦃꦠꦤ꧀ꦱꦭꦶꦤ꧀ꦧꦸꦱꦤꦱꦏꦶꦁꦱꦿꦸꦱꦱ꧀ꦩꦫꦺꦁꦠꦾꦱ꧀ꦱꦺꦮꦼꦤꦼꦱ꧀ꦲꦶꦗꦺꦴꦲꦔ꧀ꦭꦺꦴꦁꦗꦶꦮꦲꦠꦗꦶꦤ꧀ꦝꦲꦂꦤꦺꦟ꧀ꦢꦿꦕꦶꦠꦿꦤ꧀ꦤꦶꦫꦮꦸꦮꦸꦃꦧꦒꦸꦱ꧀‌ꦏꦢꦾꦧꦛꦫꦩꦂꦩꦠ
21tanpa mandara sang aji / miwah tan salin busana / saking sru sasmarèng tyase / wênês ijo anglongjiwa / atajin dhahar nendra / citranira wuwuh bagus / kadya Bathara Marmata
꧒꧒ꦩꦸꦫꦸꦧ꧀ꦲꦶꦁꦏꦁꦕꦃꦪꦮꦶꦔꦶꦠ꧀‌ꦭꦶꦂꦲꦾꦁꦔꦱ꧀ꦩꦫꦠꦸꦩꦼꦝꦏ꧀‌ꦱꦮꦶꦪꦺꦴꦱ꧀ꦱꦶꦫꦯꦁꦏꦡꦺꦴꦁꦥꦶꦤ꧀ꦤꦫꦏ꧀ꦲꦶꦁꦱꦶꦠꦶꦧꦼꦤ꧀ꦠꦂꦥꦼꦥꦏ꧀ꦥꦫꦥꦿꦠꦶꦮꦥꦫꦩꦁꦒꦭꦤ꧀ꦤꦶꦁꦏꦺꦮꦸꦃꦱꦸꦩꦶꦮꦺꦁꦧꦾꦤ꧀ꦠꦫꦤꦠ
22murub ingkang cahya wingit / lir Hyang Asmara tumêdhak / sawiyosira sang katong / pinarak ing sitibêntar / pêpak para pratiwa / para manggalaning kewuh / sumiwèng byantara nata
꧒꧓ꦱꦸꦥꦼꦤꦸꦃꦏꦁꦥꦫꦩꦤ꧀ꦠꦿꦶꦲꦟ꧀ꦝꦺꦂꦲꦤ꧀ꦤꦺꦁꦥꦒꦼꦭꦂꦫꦤ꧀‌ꦢꦼꦩꦁꦔꦧꦺꦲꦶꦫꦁꦒꦤ꧀ꦤꦺꦱꦶꦤꦔꦂꦪꦏꦟ꧀ꦝꦸꦫꦸꦮꦤ꧀‌ꦱꦶꦫꦂꦪꦮꦶꦗꦤ꧀ꦤꦂꦏꦫꦢꦺꦤ꧀ꦢꦪꦤꦶꦁꦔꦿꦠ꧀ꦔꦪꦸꦤ꧀‌ꦲꦗꦗꦂꦱꦩꦶꦱꦤ꧀ꦠꦤ
23supênuh kang para mantri / andhèr anèng pagêlaran / dêmang ngabèi ranggane / sinangarya kandhuruan / sirarya Wijanarka / Radèn Dayaningrat ngayun / ajajar sami santana
꧒꧔ꦠꦸꦩꦼꦁꦒꦸꦁꦩꦺꦴꦁꦥꦿꦗꦭꦶꦁꦒꦶꦃꦗꦗꦂꦭꦤ꧀ꦢꦼꦩꦁꦔꦸꦫꦮꦤ꧀‌ꦲꦢꦶꦦꦡꦶꦩꦠꦲꦸꦤ꧀ꦤꦺꦥꦼꦥꦏ꧀ꦥꦸꦁꦒꦮꦺꦁꦩꦭꦮꦒꦼꦁꦲꦭꦶꦠ꧀ꦱꦸꦩꦺꦮꦏꦩꦤ꧀ꦠꦿꦶꦠꦤ꧀ꦏꦼꦤ꧀ꦤꦲꦶꦔꦺꦠꦸꦁꦏꦢꦶꦠꦿꦸꦤ꧀ꦤꦤ꧀ꦤꦶꦁꦲꦸꦢꦪ
24Tumênggung Mongpraja linggih / jajar lan Dêmang Ngurawan / Adipati Mataune / pêpak punggawèng Malawa / gêng alit sumewaka / mantri tan kêna ingitung / kadi trunaning udaya
꧒꧕ꦏꦾꦤꦥꦠꦶꦃꦧꦛꦶꦏ꧀ꦩꦢꦿꦶꦩ꧀‍ꦔꦤ꧀ꦢꦶꦏꦤ꧀ꦩꦿꦶꦁꦱꦶꦠꦶꦧꦼꦤ꧀ꦠꦂꦥꦿꦥ꧀ꦠꦺꦁꦔꦂꦰꦠꦸꦂꦱꦼꦩ꧀ꦧꦃꦲꦺꦔꦤ꧀ꦢꦶꦏꦯꦿꦶꦤꦫꦢꦶꦦꦢꦶꦏꦥꦫꦲꦶꦁꦔꦂꦰꦤꦼꦩ꧀ꦧꦃꦱꦤ꧀ꦢꦶꦏꦩꦔꦪꦸꦤ꧀‍ꦯꦁꦟꦡꦩꦭꦶꦃꦔꦤ꧀ꦢꦶꦏ
25Kyana Patih Bathikmadrim / ngandikan mring sitibêntar / praptèng ngarsa tur sêmbahe / ngandika sri naradipa / dikapara ing ngarsa / nêmbah sandika mangayun / sang nata malih ngandika
꧒꧖ꦩꦂꦩꦱꦶꦫꦱꦸꦤ꧀ꦠꦶꦩ꧀ꦧꦭ꧀ꦭꦶꦏꦏꦁꦩꦫꦶꦁꦔꦂꦰꦤ꧀ꦤꦶꦁꦮꦁꦠꦾꦱ꧀ꦲꦶꦁꦱꦸꦤ꧀ꦱꦿꦸꦉꦚ꧀ꦕꦏꦤ꧀ꦤꦺꦏꦪꦥꦫꦤ꧀ꦫꦺꦃꦩꦤ꧀ꦤꦶꦫꦠꦤ꧀ꦧꦸꦃꦱꦺꦴꦠꦤ꧀ꦤꦶꦁꦢꦿꦶꦪꦲꦶꦁꦱꦸꦤ꧀ꦲꦶꦏꦶꦫꦡꦸꦲꦒꦸꦁꦲꦩꦸꦁꦕꦕꦢ꧀ꦢꦺꦱꦔꦫ
26marma sira sun timbali / kakang maring ngarsaningwang / tyas ingsun sru rêncakane / kayaparan rèh manira / tanbuh sotaning driya / ingsun iki ratu agung / amung cacade sangara
꧒꧗ꦏꦱꦸꦱꦿꦲꦶꦁꦤꦸꦱ꧀ꦮꦧꦸꦩꦶꦲꦶꦁꦱꦸꦤ꧀ꦫꦡꦸꦧꦶꦟꦛꦫꦤꦔꦶꦁꦱꦮꦶꦗꦶꦕꦕꦢ꧀ꦢꦺꦠꦶꦤ꧀ꦤꦩ꧀ꦥꦶꦏ꧀ꦩꦫꦁꦮꦤꦺꦴꦢꦾꦭꦮꦤ꧀ꦱꦸꦤ꧀ꦩꦮꦏꦿꦩꦢꦸꦫꦸꦁꦲꦕꦉꦩ꧀ꦱꦭꦸꦭꦸꦠ꧀‍ꦲꦥꦼꦱ꧀ꦗꦼꦤ꧀ꦤꦼꦁꦱꦸꦟ꧀ꦤꦫꦺꦟ꧀ꦢꦿ
27kasusra ing nuswa bumi / ingsun ratu binathara / nanging sawiji cacade / tinampik marang wanodya / lawan sun mawa krama / durung acarêm salulut / apês jênêng sun narendra
꧒꧘ꦲꦏꦂꦰꦲꦶꦁꦱꦸꦤ꧀ꦉꦔꦠ꧀ꦠꦶꦏꦏꦁꦥꦠꦶꦃꦲꦶꦥꦺꦤꦶꦫꦭꦭꦸꦲꦶꦁꦥꦔꦺꦩꦤ꧀ꦤꦶꦁꦔꦺꦴꦁꦢꦺ‍ꦤꦺꦥꦸꦠꦿꦤ꧀ꦤꦺꦱꦁꦢ꧀ꦮꦶꦗꦨꦓꦮꦤ꧀ꦩꦤꦶꦏ꧀ꦱꦸꦠꦿꦥꦠꦶꦃꦩꦢꦿꦶꦩ꧀ꦲꦮꦺꦴꦠ꧀ꦱꦤ꧀ꦠꦸꦤ꧀‍‌ꦥꦸꦏꦸꦭꦸꦤ꧀ꦱꦩ꧀ꦥꦸꦤ꧀ꦒꦾꦢꦸꦏ
28akarsa ingsun rêngati / kakang patih ipenira / lalu ing pangemaningong / dene putrane sang dwija / Bagawan Maniksutra / Patih Madrim awotsantun / pukulun sampun gya duka
꧒꧙ꦱꦩ꧀ꦥꦸꦤ꧀ꦗꦩꦏ꧀ꦏꦶꦁꦥꦮꦺꦱ꧀ꦠꦿꦶꦢꦺꦮꦗꦶꦲꦩ꧀ꦧꦼꦒ꧀ꦮꦶꦱꦸꦤ꧀ꦤꦏꦼꦢꦃꦲꦶꦁꦔꦼꦩꦺꦴꦁꦱꦺꦴꦭꦃꦲꦺꦩꦤ꧀ꦤꦮꦶꦱꦩ꧀ꦥꦸꦤ꧀ꦏꦗꦶꦮꦪꦏ꧀ꦠꦶꦲꦤꦸꦠ꧀ꦱꦏꦂꦰꦤꦶꦰ꧀ꦛꦥꦚ꧀ꦗꦼꦤ꧀ꦤꦼꦁꦔꦤ꧀ꦦꦿꦨꦸꦪꦺꦤ꧀ꦉꦔꦠ꧀ꦠꦩꦫꦁꦒꦂꦮ
29sampun jamaking pawèstri / dewaji ambêg wisuna / kêdah ingêmong solahe / manawi sampun kajiwa / yakti anut sakarsa / nistha panjenêngan prabu / yèn rêngata marang garwa
꧓꧐ꦭꦶꦥꦸꦂꦠꦾꦱ꧀ꦱꦶꦫꦟꦂꦦꦡꦶꦩꦾꦂꦱꦲꦠꦸꦂꦫꦺꦲꦥꦠꦾꦢꦢꦾꦫꦶꦱ꧀ꦥꦔꦤ꧀ꦢꦶꦏꦤ꧀ꦤꦺꦏꦏꦁꦱꦸꦤ꧀ꦲꦂꦰꦕꦁꦏꦿꦩꦩꦫꦶꦁꦠꦩꦤ꧀ꦧꦒꦺꦟ꧀ꦝꦱꦲꦺꦴꦱ꧀ꦤꦢꦶꦥꦁꦒꦤꦶꦁꦱꦸꦤ꧀‍ꦱꦤ꧀ꦢꦶꦏꦲꦠꦸꦂꦫꦶꦁꦥꦠꦾ
30lipur tyasira narpati / myarsa ature apatya / dadyaris pangandikane / kakang sun arsa cangkrama / maring taman Bagendha / saosna dipangganingsun / sandika aturing patya
꧓꧑ꦱ꧀ꦮꦤ꧀ꦢꦤꦱꦩ꧀ꦥꦸꦤ꧀ꦱꦸꦩꦗꦶꦮꦮꦔꦺꦴꦤ꧀ꦧꦭꦸꦢꦿꦸꦉꦏ꧀ꦠꦲꦥꦭꦶꦱꦶꦂꦱꦸꦠꦿꦗꦼꦤ꧀ꦤꦺꦲꦥꦸꦱ꧀ꦧꦸꦤ꧀ꦠꦸꦠ꧀ꦏꦸꦱ꧀ꦮꦫꦒꦏꦏꦭꦸꦁꦩꦱ꧀ꦫꦶꦤ꧀ꦤꦼꦁꦒꦥꦶꦤ꧀ꦤꦏ꧀ꦮꦺꦁꦲꦶꦤ꧀ꦠꦼꦤ꧀ꦗꦸꦩꦼꦫꦸꦫ꧀‌ꦩꦸꦫꦸꦧ꧀ꦲꦸꦗ꧀ꦮꦭꦤ꧀ꦤꦶꦁꦉꦠ꧀ꦤ
31swandana sampun sumaji / wêwangon baludru rêkta / apalisir sutra jêne / apus buntut kuswaraga / kêkalung mas rinêngga / pinakwèng intên jumêrut / murub ujwalaning rêtna
꧓꧒ꦢꦶꦥꦺꦴꦁꦒꦢꦶꦤꦸꦭꦸꦲꦱꦿꦶꦏꦁꦠꦸꦭꦭꦺꦲꦶꦁꦔꦸꦊꦱ꧀ꦱꦤ꧀‌ꦱꦸꦠꦿꦉꦏ꧀ꦠꦭꦮꦤ꧀ꦲꦶꦗꦺꦴꦪꦺꦤ꧀ꦲꦔꦢꦼꦒ꧀ꦏꦢꦶꦠꦺꦗꦩꦭꦁꦭꦶꦂꦮꦶꦒꦾꦸꦠ꧀ꦩꦭꦩꦊꦁꦏꦸꦁꦏꦢꦾꦏꦸꦏꦸꦮꦸꦁꦩꦺꦴꦭꦃꦭꦶꦂꦕꦭꦫꦠ꧀ꦮꦂꦰ
32dipôngga dinulu asri / kang tulale ingulêsan / sutra rêkta lawan ijo / yèn angadêg kadi teja / malang lir wigyutmala / malêngkung kadya kêkuwung / molah lir calarat warsa
꧓꧓ꦱꦩ꧀ꦥꦸꦤ꧀ꦲꦮꦲꦤꦲꦺꦰ꧀ꦛꦶꦩꦲꦫꦗꦲꦁꦔ꧀ꦭꦶꦁꦢꦂꦩꦏꦢꦾꦤꦶꦂꦏꦩꦤꦸꦱꦤ꧀ꦤꦺꦠꦶꦤ꧀ꦤꦺꦴꦤ꧀ꦭꦶꦂꦲꦾꦁꦯꦏꦿꦶꦠꦼꦝꦏ꧀‌ꦪꦸꦤ꧀ꦩꦁꦒꦸꦠ꧀ꦪꦸꦢꦩꦼꦂꦱꦃꦤꦶꦮꦠꦏꦮꦕꦦꦿꦧꦸꦫꦠꦸꦲꦶꦩꦲꦶꦩꦤ꧀ꦠꦏ
33sampun awahana èsthi / Maharaja Anglingdarma / kadya nir kamanusane / tinon lir Hyang Sakri têdhak / yun manggut yuda mêngsah / Niwatakawaca Prabu / Ratu Hima Himantaka
꧓꧔ꦱꦸꦩꦽꦒ꧀ꦏꦁꦮꦢꦾꦭꦸꦩꦫꦶꦱ꧀‌ꦧꦸꦝꦭ꧀ꦭꦶꦫꦱꦏꦶꦁꦥꦿꦗꦱꦿꦶꦠꦶꦤꦺꦴꦤ꧀ꦲꦸꦥꦕꦫꦤ꧀ꦤꦺꦗꦗꦂꦫꦤ꧀ꦲꦮꦂꦟꦮꦂꦟꦮꦢꦾꦯꦶꦏꦼꦥ꧀ꦒꦒꦩꦤ꧀‌ꦧꦶꦤꦸꦱꦤꦤ꧀ꦲꦧꦿꦩꦸꦫꦸꦧ꧀‌ꦠꦸꦭꦾꦥꦸꦱ꧀ꦥꦶꦠꦱꦠꦩꦤ꧀‌
34sumrêg kang wadya lumaris / budhalira saking praja / sri tinon upacarane / jajaran awarna-warna / wadya sikêp gêgaman / binusanan abra murub / tulya puspita sataman
꧓꧕ꦱꦫꦒꦼꦤ꧀ꦤꦶꦱꦶꦏꦼꦥ꧀ꦧꦼꦝꦶꦭ꧀‌ꦮꦺꦴꦁꦚꦸꦠꦿꦱꦶꦏꦼꦥ꧀ꦮꦫꦱ꧀ꦠꦿꦢꦠꦤ꧀ꦏꦭꦶꦫꦸꦥꦽꦤ꧀ꦤꦃꦲꦺꦮꦲꦺꦴꦱ꧀ꦧꦶꦤ꧀ꦤꦁꦫꦸꦫꦸꦮꦶꦠ꧀ꦠꦤ꧀‌ꦕꦼꦩꦼꦁꦏꦸꦩ꧀ꦧꦭꦧꦝꦏ꧀‌ꦢ꧀ꦮꦗꦭꦮꦤ꧀ꦲꦸꦩ꧀ꦧꦸꦭ꧀ꦲꦸꦩ꧀ꦧꦸꦭ꧀‌ꦢꦭꦸꦢꦏ꧀ꦊꦭꦪꦸꦲꦧꦿ
35saragêni sikêp bêdhil / wong nyutra sikêp warastra / datan kaliru prênahe / waos binang rêruwitan / cêmêng kumbala badhak / dwaja lawan umbul-umbul / daludak lêlayu abra
꧓꧖ꦢꦼꦩꦁꦔꦸꦫꦮꦤ꧀ꦔꦿꦸꦲꦸꦤ꧀ꦤꦶꦭꦩ꧀ꦥꦃꦲꦶꦫꦱꦲꦮꦢꦾꦩꦿꦶꦁꦮꦤꦏꦂꦪꦒꦫꦺꦴꦒꦺꦴꦭ꧀‌ꦲꦁꦒꦶꦫꦶꦁꦧꦟ꧀ꦛꦺꦁꦩꦲꦺꦱꦱꦁꦱꦩ꧀ꦏꦚ꧀ꦕꦶꦭ꧀ꦲꦫꦶꦤ꧀ꦤꦭꦗꦸꦭꦩ꧀ꦥꦃꦲꦶꦫꦺꦁꦦꦿꦨꦸꦮꦸꦱ꧀ꦫꦮꦸꦃꦲꦶꦁꦥꦒꦿꦺꦴꦒꦺꦴꦭ꧀ꦭꦤ꧀
36Dêmang Ngurawan ngruhuni / lampahira saha wadya / mring wana karya garogol / anggiring banthèng maesa / sangsam kancil arina / laju lampahirang prabu / wus rawuh ing pagrogolan
꧓꧗ꦲꦼꦤ꧀ꦠꦾꦂꦱꦯꦿꦶꦟꦫꦦꦡꦶꦲꦸꦩꦶꦪꦠ꧀ꦧꦟ꧀ꦛꦺꦁꦩꦚ꧀ꦗꦔꦤ꧀‌ꦠꦤ꧀ꦢꦾꦩꦸꦟ꧀ꦝꦸꦠ꧀ꦮꦶꦭꦶꦱ꧀ꦱꦤ꧀ꦤꦺꦲꦂꦰꦲꦁꦒꦿꦶꦠ꧀ꦱꦠꦺꦴꦮꦤꦮꦸꦱ꧀ꦩꦔꦽꦁꦒꦼꦥ꧀ꦮꦫꦱ꧀ꦠꦿꦲꦟ꧀ꦢꦏꦏꦛꦃꦏꦕꦸꦟ꧀ꦝꦸꦏ꧀‌ꦭꦶꦤꦼꦥꦱ꧀ꦱꦤ꧀ꦲꦶꦁꦯꦁꦟꦡ
37êntyarsa sri narapati / umiyat banthèng manjangan / tandya mundhut wilisane / arsa anggrit sato wana / wus mangrênggêp warastra / andaka kathah kacundhuk / linêpasan ing sang nata
꧓꧘ꦱꦶꦒꦿꦲꦶꦁꦏꦁꦥꦫꦩꦤ꧀ꦠꦿꦶꦲꦶꦁꦔꦸꦟ꧀ꦝꦁꦔꦤ꧀ꦤꦶꦠꦶꦃꦏꦸꦢꦔꦼꦩ꧀ꦧꦂꦫꦶꦩꦲꦺꦱꦧꦟ꧀ꦛꦺꦁꦒꦩ꧀ꦧꦶꦫꦮꦠꦼꦏ꧀ꦩꦁꦒꦭꦩꦾꦁꦥꦫꦩꦤ꧀ꦠꦿꦶꦱꦸꦫꦤꦤ꧀ꦢꦼꦂꦲꦱꦿꦸꦔꦼꦩ꧀ꦧꦠ꧀ꦭꦮꦸꦁꦮꦶꦤꦠꦁꦥꦸꦤꦁꦲꦤ꧀ꦢꦏ
38sigra ingkang para mantri / ingundhangan nitih kuda / ngêmbari maesa banthèng / gambira watêk manggala / myang para mantri sura / nandêr asru ngêmbat lawung / winatang punang andaka
꧓꧙ꦲꦏꦛꦃꦱꦩꦾꦔꦼꦩꦱ꧀ꦱꦶꦩꦺꦱꦟ꧀ꦝꦤꦸꦩꦾꦁꦲꦟ꧀ꦢꦏꦏꦶꦲꦂꦪꦮꦶꦗꦤ꧀ꦤꦂꦏꦤ꧀ꦤꦺꦩꦭꦃꦥꦸꦠꦸꦁꦮꦠꦁꦔꦶꦫꦲꦤ꧀ꦢꦏꦱꦿꦸꦤꦫꦗꦁꦥꦼꦗꦃꦠꦶꦤꦩ꧀ꦥꦶꦭꦶꦁꦩꦮꦸꦂꦩꦸꦏꦤ꧀ꦤꦶꦫꦥꦠꦶꦁꦥꦊꦱ꧀ꦱꦠ꧀
39akathah samya ngêmasi / mesandhanu myang andaka / Ki Arya Wijanarkane / malah putung watangira / andaka sru narajang / pêjah tinampiling mawur / mukanira ting palêsat
꧔꧐ꦲꦠꦾꦤ꧀ꦠꦱꦸꦏꦯꦁꦔꦗꦶꦲꦸꦩꦶꦪꦠ꧀ꦲꦶꦁꦥꦿꦥꦸꦁꦒꦮꦥꦿꦮꦶꦫꦱꦸꦫꦠꦤ꧀ꦢꦁꦔꦺꦩꦶꦮꦃꦏꦁꦮꦢꦾꦱꦢꦪꦱꦩꦶꦱꦸꦏꦠꦸꦩꦶꦔꦭ꧀‌ꦒꦸꦩꦸꦫꦸꦃꦱꦸꦫꦏ꧀ꦏꦶꦁꦮꦢꦸꦒꦩ꧀ꦧꦶꦫꦮꦶꦫꦠꦫꦸꦤ꧀ꦤ
40atyanta suka sang aji / umiyat ing pra punggawa / prawira sura tandange / miwah kang wadya sadaya / sami suka tumingal / gumuruh suraking wadu / gambira wira taruna