Serat Anglingdarma
Pupuh IV: Durma
Berkas ini diakses dari budiarto.id pada tanggal 22 Apr 2021. Silakan pindai kode QR di samping untuk mengakses laman daring.
Pupuh IV: Durma
Berkas ini diakses dari budiarto.id pada tanggal 22 Apr 2021. Silakan pindai kode QR di samping untuk mengakses laman daring.
| ꧑ | ꧅ꦲꦼꦤ꧀ꦤꦼꦁꦔꦼꦤ꧀ꦤꦯꦿꦶꦟꦡꦭꦤ꧀ꦒꦂꦮꦤ꧀ꦤꦶꦫ꧈ꦮꦂꦟꦤ꧀ꦤꦼꦤ꧀ꦤꦓꦓꦶꦟꦶ꧈ꦲꦺꦁꦒꦭ꧀ꦭꦩ꧀ꦥꦃꦲꦶꦫ꧈ꦥꦿꦥ꧀ꦠꦔꦂꦰꦤꦶꦁꦥꦿꦶꦪ꧈ꦱꦂꦮꦶꦠꦮꦤ꧀ꦠꦮꦤ꧀ꦠꦔꦶꦱ꧀ꦲꦁꦔ꧀ꦭꦶꦁꦯꦁꦟꦓ꧈ꦭꦃꦲꦤꦲꦥꦪꦪꦶ |
| 1 | ênêngêna sri nata lan garwanira / warnanên Nagagini / enggal lampahira / prapta ngarsaning priya / sarwi tawan-tawan tangis / angling sang Naga / lah ana apa yayi |
| ꧒ | ꧅ꦲꦗꦤꦔꦶꦱ꧀ꦧꦧꦺꦴꦱꦶꦫꦮꦼꦮꦂꦠꦲ꧈ꦭꦶꦁꦚꦯꦁꦟꦓꦓꦶꦟꦶ꧈ꦱꦸꦤ꧀ꦩꦫꦶꦁꦲꦸꦢꦾꦤ꧈ꦧꦒꦺꦟ꧀ꦝꦔꦶꦤꦸꦩ꧀ꦠꦺꦴꦪ꧈ꦱꦸꦩꦶꦠꦿꦤ꧀ꦤꦶꦫꦤꦸꦠꦸꦠ꧀ꦠꦶ꧈ꦫꦗꦁꦔ꧀ꦭꦶꦁꦢꦂꦩ꧈ꦲꦱꦶꦏꦫꦩꦿꦶꦃꦥꦠꦶ |
| 2 | aja nangis babo sira wêwartaa / lingnya sang Nagagini / sun maring udyana / bagendha nginum toya / sumitranira nututi / Raja Nglingdarma / asikara mrih pati |
| ꧓ | ꧅ꦲꦶꦁꦱꦸꦤ꧀ꦭꦸꦔꦩꦭꦸꦩ꧀ꦥꦠ꧀ꦲꦶꦁꦥꦒꦼꦂꦧꦠ꧈ꦗꦶꦤꦸꦗꦸꦭ꧀ꦲꦶꦁꦗꦼꦩ꧀ꦥꦫꦶꦁ꧈ꦏꦼꦤ꧀ꦤꦧꦸꦤ꧀ꦠꦸꦠ꧀ꦠꦶꦁꦮꦁ꧈ꦮꦢꦾꦤ꧀ꦤꦺꦥꦝꦱꦸꦫꦏ꧀ꦱꦩꦾꦔꦼꦭꦺꦴꦏ꧀ꦲꦏ꧀ꦏꦼꦤ꧀ꦩꦠꦶ꧈ꦲꦶꦁꦱꦸꦤ꧀ꦠꦤ꧀ꦭꦶꦭ꧈ꦧꦸꦤ꧀ꦠꦸꦠ꧀ꦏꦸꦤꦟ꧀ꦝꦁꦏꦤ꧀ꦤꦶꦤ꧀ |
| 3 | ingsun lunga malumpat ing pagêr bata / jinujul ing jêmparing / kêna buntut ingwang / wadyane padha surak / samya ngêlokakên mati / ingsun tan lila / buntutku nandhang kanin |
| ꧔ | ꧅ꦭꦃꦢꦺꦤ꧀ꦲꦒꦺꦲꦢꦶꦭ꧀ꦭꦤꦲꦮꦏ꧀ꦏꦶꦁꦮꦁ꧈ꦮꦊꦱ꧀ꦱꦼꦤ꧀ꦲꦸꦏꦸꦩ꧀ꦥꦠꦶ꧈ꦫꦗꦲꦁꦔ꧀ꦭꦶꦁꦢꦂꦩ꧈ꦲꦶꦏꦫꦡꦸꦢꦸꦂꦱꦶꦭ꧈ꦲꦔꦭꦤ꧀ꦤꦶꦲꦶꦁꦮꦺꦴꦁꦧꦼꦕꦶꦏ꧀ꦏꦭꦩꦸꦤ꧀ꦱꦶꦫ꧈ꦤꦺꦴꦫꦏꦺꦴꦭꦸꦩꦠꦺꦤ꧀ꦤꦶ |
| 4 | lah dèn age adilana awak ingwang / walêsên ukum pati / Raja Anglingdarma / ika ratu dursila / angalani ing wong bêcik / kalamun sira / nora kolu matèni |
| ꧕ | ꧅ꦩꦫꦶꦁꦫꦗꦲꦁꦔ꧀ꦭꦶꦁꦢꦂꦩꦲꦶꦁꦩꦭꦮ꧈ꦭꦃꦲꦸꦮꦶꦱ꧀ꦲꦶꦁꦱꦸꦤ꧀ꦲꦩꦶꦠ꧀ꦲꦊꦧꦸꦠꦸꦩꦔꦤ꧀ꦲꦮꦶꦫꦁꦩꦫꦁꦢꦺꦮ꧈ꦠꦤ꧀ꦢꦽꦩꦤ꧀ꦲꦶꦁꦱꦸꦤ꧀ꦤꦲꦸꦫꦶꦥ꧀ꦢꦺꦤ꧀ꦏꦤꦶꦲꦪ꧈ꦲꦶꦁꦮꦺꦴꦁꦠꦤ꧀ꦲꦤꦸꦭꦸꦁꦔꦶ |
| 5 | maring Raja Anglingdarma ing Malawa / lah uwis ingsun amit / alêbu tumangan / awirang marang dewa / tan drêman ingsun aurip / dèn kaniaya / ing wong tan anulungi |
| ꧖ | ꧅ꦪꦺꦤ꧀ꦩꦁꦏꦺꦴꦤꦺꦴꦲꦧꦺꦴꦠ꧀ꦩꦫꦁꦲꦁꦔ꧀ꦭꦶꦁꦢꦂꦩ꧈ꦥꦺꦢꦃꦲꦥꦥꦮꦺꦱ꧀ꦠꦿꦶ꧈ꦯꦁꦟꦓꦦꦿꦡꦭ꧈ꦩꦾꦂꦱꦱꦩ꧀ꦧꦠ꧀ꦠꦶꦁꦒꦂꦮ꧈ꦏꦭꦁꦏꦸꦁꦲꦔꦽꦱ꧀ꦲꦶꦁꦒꦭꦶꦃ꧈ꦥꦤ꧀ꦢꦸꦫꦸꦁꦔꦤ꧈ꦕꦶꦢꦿꦤ꧀ꦤꦺꦟꦓꦓꦶꦟꦶ |
| 6 | yèn mangkono abot marang Anglingdarma / pedah apa pawèstri / Sang Nagapratala / myarsa sambating garwa / kalangkung angrês ing galih / pan durung ana / cidrane Nagagini |
| ꧗ | ꧅ꦭꦶꦂꦱꦶꦤ꧀ꦤꦼꦧꦶꦠ꧀ꦠꦭꦶꦁꦔꦤ꧀ꦤꦶꦫꦯꦁꦟꦓ꧈ꦏꦿꦺꦴꦝꦩꦮꦶꦔꦮꦼꦔꦶꦱ꧀ꦲꦏ꧀ꦱꦶꦤ꧀ꦠꦩꦉꦏ꧀ꦠ꧈ꦠꦶꦤꦺꦴꦤ꧀ꦏꦢꦶꦧꦱ꧀ꦏꦫ꧈ꦏꦼꦩ꧀ꦧꦂꦢꦂꦥꦲꦔꦽꦉꦱ꧀ꦱꦶ꧈ꦩꦒꦼꦁꦧꦶꦱꦤ꧈ꦫꦶꦏꦁꦧꦸꦤ꧀ꦠꦸꦠ꧀ꦏꦸꦩꦶꦠꦶꦂ |
| 7 | lir sinêbit talinganira sang naga / krodha mawinga wêngis / aksinta marêkta / tinon kadi baskara / kêmbar darpa angrêrêsi / magêng bisana / ri kang buntut kumitir |
| ꧘ | ꧅ꦭꦶꦂꦥꦚꦸꦏꦸꦂꦱꦶꦱꦶꦏ꧀ꦏꦺꦟꦓꦦꦿꦡꦭ꧈ꦲꦸꦥꦱ꧀ꦱꦸꦩꦶꦫꦠ꧀ꦏꦸꦤꦶꦁ꧈ꦭꦶꦂꦩꦸꦫꦸꦧ꧀ꦏꦁꦤꦺꦠꦿ꧈ꦗꦶꦲ꧀ꦮꦲꦱꦮꦁꦏꦶꦭꦠ꧀ꦢꦼꦤ꧀ꦠꦏꦢꦾꦭꦶꦤ꧀ꦠꦁꦔꦭꦶꦃ꧈ꦱꦧꦺꦴꦁꦏꦺꦴꦠ꧀ꦠꦶꦁꦠꦭ꧀ꦒꦼꦁꦔꦶꦫꦲꦶꦁꦏꦁꦥꦼꦛꦶꦠ꧀ |
| 8 | lir panyukur sisike Nagapratala / upas sumirat kuning / lir murub kang netra / jihwa asawang kilat / dênta kadya lintang ngalih / sabongkoting tal / gêngira ingkang pêthit |
| ꧙ | ꧅ꦲꦸꦤ꧀ꦠꦸꦫꦔꦃꦭꦶꦂꦢꦿꦶꦒꦩꦮꦸꦭꦸꦃꦮꦸꦁꦮꦁ꧈ꦝꦿꦱ꧀ꦛꦤ꧀ꦤꦶꦫꦭꦶꦂꦒꦝꦶꦁ꧈ꦩꦸꦏꦏꦢꦶꦥꦫꦁ꧈ꦒꦿꦤꦭꦶꦂꦒꦸꦮꦏꦼꦩ꧀ꦧꦂ꧈ꦔꦏꦏ꧀ꦱ꧀ꦮꦧꦮꦔꦗꦿꦶꦃꦲꦶ꧈ꦲꦱꦿꦸꦲꦔꦸꦕꦥ꧀ꦏꦫꦶꦪꦟꦓꦓꦶꦟꦶ |
| 9 | untu rangah lir drigama wuluh wungwang / dhrasthanira lir gadhing / muka kadi parang / grana lir guwa kêmbar / ngakak swabawa ngajrihi / asru angucap / karia Nagagini |
| ꧑꧐ | ꧅ꦢꦸꦏ꧀ꦲꦸꦩꦶꦗꦶꦭ꧀ꦱꦶꦫꦟꦓꦦꦿꦡꦭ꧈ꦔꦩ꧀ꦧꦁꦩꦶꦢꦼꦂꦫꦶꦁꦠꦱꦶꦏ꧀ꦗꦶꦲ꧀ꦮꦔꦭꦢ꧀ꦢꦭꦢ꧀ꦩꦼꦭꦶꦁꦔꦶꦱ꧀ꦮꦫꦔꦏꦏ꧀ꦩꦶꦢꦼꦂꦱꦩ꧀ꦧꦤ꧀ꦤꦶꦁꦗꦭꦢꦿꦶ꧈ꦱꦶꦒꦿꦲꦸꦩꦼꦢꦭ꧀ꦩꦫꦁꦩꦭꦮꦥꦠꦶ |
| 10 | duk umijil sira Sang Nagapratala / ngambang midêr ing tasik / jihwa ngalad-alad / mêlingi swara ngakak / midêr sambaning jaladri / sigra umêdal / marang Malawapati |
| ꧑꧑ | ꧅ꦱꦩ꧀ꦥꦸꦤ꧀ꦭꦶꦩꦸꦠ꧀ꦢꦂꦢꦾꦤ꧀ꦤꦶꦫꦲꦩꦶꦩꦶꦠꦿ꧈ꦭꦮꦤ꧀ꦱꦿꦶꦟꦫꦦꦡꦶ꧈ꦲꦂꦰꦥꦶꦤ꧀ꦤꦝꦼꦩ꧀ꦩꦤ꧀ꦢꦺꦯꦁꦟꦓꦦꦿꦭ꧈ꦱꦶꦁꦮꦶꦱꦸꦤꦺꦁꦟꦓꦓꦶꦟꦶ꧈ꦲꦶꦁꦏꦁꦏꦲꦺꦠꦁ꧈ꦠꦽꦱ꧀ꦤꦤ꧀ꦤꦶꦫꦩꦿꦶꦁꦫꦧꦶ |
| 11 | sampun limut dardyanira amêmitra / lawan sri narapati / arsa pinadhêman / de Sang Nagapratala / sing wisunèng Nagagini / ingkang kaetang / trêsnanira mring rabi |
| ꧑꧒ | ꧅ꦭꦶꦂꦮꦶꦢꦾꦸꦠꦭꦩ꧀ꦥꦃꦲꦺꦟꦓꦦꦿꦡꦭ꧈ꦱꦥꦔꦸꦤꦸꦭꦾꦥꦿꦥ꧀ꦠꦶ꧈ꦱꦗꦿꦺꦴꦤ꧀ꦤꦶꦫꦺꦁꦏꦸꦛ꧈ꦏꦟ꧀ꦝꦼꦒ꧀ꦲꦶꦁꦥꦤ꧀ꦤꦁꦏꦶꦭ꧀ꦭꦤ꧀ꦏꦛꦃꦥꦸꦁꦒꦮꦏꦁꦏꦼꦩꦶꦠ꧀ꦥꦤ꧀ꦲꦶꦔꦸꦟ꧀ꦝꦁꦔꦤ꧀ꦩꦿꦶꦁꦥꦠꦶꦃꦧꦛꦶꦏ꧀ꦩꦢꦿꦶꦩ꧀ |
| 12 | lir widyuta lampahe Nagapratala / sapangu nulya prapti / sajronirèng kutha / kandhêg ing panangkilan / kathah punggawa kang kêmit / pan ingundhangan / mring Patih Bathikmadrim |
| ꧑꧓ | ꧅ꦥꦿꦤꦪꦏꦱꦮꦢꦾꦤ꧀ꦤꦶꦫꦱꦮꦺꦒ꧈ꦱꦏꦦꦿꦧꦺꦴꦤ꧀ꦤꦶꦁꦗꦸꦫꦶꦠ꧀ꦲꦥꦠꦶꦃꦭꦶꦁꦔꦶꦫ꧈ꦲꦺꦃꦱꦒꦸꦁꦔꦶꦁꦥꦸꦁꦒꦮ꧈ꦢꦺꦤ꧀ꦥꦝꦲꦔꦠꦶꦲꦠꦶ꧈ꦲꦪ꧀ꦮꦤꦭꦺꦤ꧀ꦤ꧈ꦟꦓꦦꦿꦡꦭꦱꦏ꧀ꦠꦶ |
| 13 | pra nayaka sawadyanira sawega / sakapraboning jurit / apatih lingira / hèh sagunging punggawa / dèn padha angati-ati / aywana lena / Nagapratala sakti |
| ꧑꧔ | ꧅ꦩꦺꦱꦼꦩ꧀ꦱꦶꦫꦟꦓꦦꦿꦡꦭꦩꦶꦪꦂꦰ꧈ꦲꦔ꧀ꦭꦶꦁꦱꦗꦿꦺꦴꦤ꧀ꦤꦶꦁꦒꦭꦶꦃ꧈ꦠꦟ꧀ꦝꦤ꧀ꦤꦺꦪꦺꦤ꧀ꦲꦭ꧈ꦯꦁꦫꦗꦲꦁꦔ꧀ꦭꦶꦁꦢꦂꦩ꧈ꦱꦏꦺꦃꦥꦸꦁꦒꦮꦏꦁꦏꦼꦩꦶꦠ꧀ꦲꦠꦶꦤ꧀ꦤꦺꦗꦒ꧈ꦥꦝꦥꦠꦶꦁꦧꦛꦶꦛꦶꦠ꧀ |
| 14 | mèsêm sira Nagapratala miyarsa / angling sajroning galih / tandhane yèn ala / sang Raja Anglingdarma / sakèh punggawa kang kêmit / atine jaga / padha pating bathithit |
| ꧑꧕ | ꧅ꦪꦺꦤ꧀ꦲꦂꦰꦲꦟꦓꦦꦿꦡꦭꦱꦶꦏꦫ꧈ꦩꦫꦶꦁꦥꦸꦁꦒꦮꦩꦤ꧀ꦠꦿꦶ꧈ꦥꦰ꧀ꦛꦶꦠꦸꦠꦸꦩ꧀ꦥꦼꦱ꧀ꦱꦤ꧀ꦲꦤ꧀ꦤꦔꦶꦁꦕꦶꦥ꧀ꦠꦤ꧀ꦤꦶꦫ꧈ꦢꦠꦤ꧀ꦲꦂꦰꦩꦩꦠꦺꦤ꧀ꦤꦶ꧈ꦮꦺꦴꦁꦠꦤ꧀ꦥꦢꦺꦴꦱ꧈ꦗꦿꦶꦃꦢꦸꦏꦤꦶꦁꦢꦺꦮꦢꦶ |
| 15 | yèn arsaa Nagapratala sikara / maring punggawa mantri / pasthi têtumpêsan / ananging ciptanira / datan arsa mêmatèni / wong tanpa dosa / jrih dukaning dewadi |
| ꧑꧖ | ꧅ꦪꦠꦩꦸꦤ꧀ꦢꦸꦂꦯꦁꦟꦓꦲꦠꦿꦶꦮꦶꦏꦿꦩ꧈ꦔꦢꦼꦒ꧀ꦲꦶꦁꦮꦿꦶꦔꦶꦤ꧀ꦫꦏꦶꦠ꧀ꦱꦗꦼꦩ꧀ꦧꦂꦫꦶꦁꦗꦒꦠ꧀ꦏꦮꦱꦔꦶꦢꦼꦂꦫꦤ꧈ꦮꦸꦱ꧀ꦗꦼꦩꦸꦂꦭꦤ꧀ꦢꦺꦮꦉꦰꦶ꧈ꦩꦚ꧀ꦗꦶꦁꦗꦿꦺꦴꦥꦸꦫ꧈ꦢꦠꦤ꧀ꦤꦤꦲꦸꦢꦤ꧀ꦤꦶ |
| 16 | ya ta mundur sang naga atriwikrama / ngadêg ing wringin rakit / sajêmbaring jagad / kawasa ngidêrana / wus jêmur lan dewa rêsi / manjing jro pura / datan ana udani |
| ꧑꧗ | ꧅ꦤꦶꦤ꧀ꦢꦾꦱꦏ꧀ꦠꦶꦱꦶꦫꦯꦁꦠꦏ꧀ꦱꦏꦫꦗ꧈ꦢꦠꦤ꧀ꦲꦩꦮꦶꦩꦂꦒꦶ꧈ꦢꦺꦤ꧀ꦚꦩꦚ꧀ꦗꦶꦁꦥꦸꦫ꧈ꦢꦠꦤ꧀ꦲꦩꦮꦶꦱ꧀ꦮꦫ꧈ꦤꦺꦁꦧꦁꦱꦭ꧀ꦮꦔꦸꦤ꧀ꦤꦤ꧀ꦲꦱꦿꦶ꧈ꦱꦩ꧀ꦥꦸꦤ꧀ꦥꦿꦱ꧀ꦠꦮ꧈ꦲꦶꦁꦥꦽꦤ꧀ꦤꦃꦲꦺꦯꦁꦔꦗꦶ |
| 17 | nindya sakti sira sang taksaka raja / datan amawi margi / dènnya manjing pura / datan amawi swara / nèng bangsal wangunan asri / sampun prastawa / ing prênahe sang aji |
| ꧑꧘ | ꧅ꦠꦼꦏꦫꦔꦸꦫꦔꦸꦯꦁꦟꦓꦦꦿꦡꦭ꧈ꦏꦫꦤ꧀ꦠꦤ꧀ꦗꦿꦺꦴꦤ꧀ꦤꦶꦁꦔꦠꦶ꧈ꦢꦺꦤ꧀ꦚꦲꦩꦶꦩꦶꦠꦿ꧈ꦭꦮꦤ꧀ꦱꦿꦶꦟꦫꦟꦡ꧈ꦫꦶꦏꦭꦤ꧀ꦤꦶꦫꦲꦭꦶꦁꦒꦶꦃ꧈ꦲꦤ꧀ꦤꦺꦁꦥꦲꦼꦩ꧀ꦩꦤ꧀ꦗꦁꦗꦶꦏꦢꦁꦱꦪꦼꦏ꧀ꦠꦶ |
| 18 | têka rangu-rangu Sang Nagapratala / karantan jroning ati / dènnya amêmitra / lawan sri naranata / rikalanira alinggih / anèng pahêman / jangji kadang sayakti |
| ꧑꧙ | ꧅ꦏꦮꦂꦤꦲꦲꦶꦁꦏꦁꦭꦒꦾꦱꦼꦱꦫꦺꦪꦤ꧀ꦥꦿꦠꦶꦰ꧀ꦛꦺꦁꦠꦶꦭꦩ꧀ꦱꦫꦶ꧈ꦫꦗꦲꦁꦔ꧀ꦭꦶꦁꦢꦂꦩ꧈ꦏꦭꦮꦤ꧀ꦢꦺꦮꦶꦱꦼꦠꦾ꧈ꦱꦩꦤꦲꦤꦸꦭꦾꦱꦩꦶ꧈ꦊꦁꦒꦃꦏꦭꦶꦪꦤ꧀ꦯꦁꦢꦾꦃꦩꦠꦸꦂꦮꦺꦴꦠ꧀ꦱꦫꦶ |
| 19 | kawarnaa ingkang lagya sêsarean / pratisthèng tilamsari / Raja Anglingdarma / kalawan Dèwi Sêtya / samana anulya sami / lênggah kalihan / sang dyah matur wotsari |
| ꧒꧐ | ꧅ꦝꦸꦃꦥꦸꦏꦸꦭꦸꦤ꧀ꦠꦤ꧀ꦲꦺꦕꦫꦲꦺꦴꦱ꧀ꦱꦶꦁꦢꦿꦶꦪ꧈ꦱꦫꦮꦸꦃꦥꦢꦸꦏꦗꦶ꧈ꦱꦏꦶꦁꦲꦕꦁꦏꦿꦩ꧈ꦏꦢꦶꦮꦺꦴꦁꦢꦸꦏꦕꦶꦥ꧀ꦠ꧈ꦲꦧ꧀ꦢꦶꦤ꧀ꦤꦺꦏꦭꦁꦏꦸꦁꦲꦗꦿꦶꦃ꧈ꦢꦺꦫꦺꦁꦲꦸꦤ꧀ꦤꦶꦔ꧈ꦱꦶꦱꦶꦏꦸꦤ꧀ꦤꦶꦁꦥꦮꦺꦰ꧀ꦠꦿꦶ |
| 20 | dhuh pukulun tan eca raosing driya / sarawuh padukaji / saking pacangkrama / kadi wong duka cipta / abdine kalangkung ajrih / dèrèng uninga / sêsikuning pawèstri |
| ꧒꧑ | ꧅ꦏꦛꦃꦠꦸꦤꦢꦸꦁꦏꦥ꧀ꦥꦺꦠꦼꦠꦶꦪꦁꦲꦂꦒ꧈ꦠꦤ꧀ꦮꦿꦶꦤ꧀ꦢꦸꦒꦶꦥꦿꦪꦺꦴꦒꦶ꧈ꦱꦿꦸꦩꦫꦱ꧀ꦏꦮꦸꦭ꧈ꦩꦤ꧀ꦤꦮꦶꦏꦊꦥꦠ꧀ꦠꦤ꧀ꦲꦶꦁꦠꦶꦤ꧀ꦢꦏ꧀ꦠꦤ꧀ꦢꦸꦏ꧀ꦏꦶꦁꦲꦺꦰ꧀ꦠꦿꦶ꧈ꦢꦺꦤ꧀ꦲꦸꦤ꧀ꦤꦶꦔꦏ꧀ꦤ꧈ꦫꦺꦃꦤꦶꦁꦲꦶꦠꦶꦏ꧀ꦏꦤ꧀ꦮꦸꦏꦶꦂ |
| 21 | kathah tuna dungkape têtiyang arga / tan wrin dugi prayogi / sru maras kawula / manawi kalêpatan / ing tindak-tanduking èstri / dèn uningakna / rèhning itikan wukir |
| ꧒꧒ | ꧅ꦲꦔꦤ꧀ꦢꦶꦏꦯꦁꦟꦡꦲꦔꦪꦸꦃꦩꦢꦾ꧈ꦝꦸꦃꦲꦠ꧀ꦩꦗꦶꦮꦩꦩꦶ꧈ꦲꦪ꧀ꦮꦱꦭꦃꦠꦺꦴꦩ꧀ꦥ꧈ꦱꦸꦁꦏꦮꦤ꧀ꦤꦶꦁꦠꦾꦱ꧀ꦱꦶꦁꦮꦁ꧈ꦢꦸꦏ꧀ꦲꦶꦁꦯꦸꦤ꧀ꦕꦁꦏꦿꦩꦪꦪꦶ꧈ꦧꦚ꧀ꦗꦸꦂꦩꦿꦶꦁꦠꦩꦤ꧀ꦧꦒꦺꦟ꧀ꦝꦱꦼꦢꦾꦩꦩꦶ |
| 22 | angandika sang nata angayuh madya / dhuh atma jiwa mami / aywa salah tămpa / sungkawaning tyas ingwang / duk ingsun cangkrama yayi / banjur mring taman / Bagendha sêdya mami |
| ꧒꧓ | ꧅ꦲꦂꦰꦱꦶꦫꦩ꧀ꦱꦥꦿꦥ꧀ꦠꦤ꧀ꦤꦶꦁꦱꦸꦤ꧀ꦲꦶꦁꦠꦩꦤ꧀ꦥꦤꦸꦗꦸꦠꦼꦁꦔꦃꦮꦼꦔꦶ꧈ꦲꦤꦏꦁꦠꦏ꧀ꦱꦏ꧈ꦏꦶꦂꦢꦗꦿꦺꦴꦤ꧀ꦤꦶꦁꦔꦸꦢꦾꦤ꧈ꦒꦮꦺꦴꦏ꧀ꦱꦏꦺꦃꦏꦁꦲꦸꦩꦺꦏ꧀ꦱꦶ꧈ꦩꦫꦁꦒꦸꦁꦔꦶꦫ꧈ꦏꦤ꧀ꦤꦁꦧꦸꦗꦺꦴꦁꦒꦲꦺꦱ꧀ꦠꦿꦶ |
| 23 | arsa siram sapraptaningsun ing taman / panuju têngah wêngi / ana kang taksaka / kirda jroning udyana / gawok sakèh kang umaksi / marang gungira / kanang bujăngga èstri |
| ꧒꧔ | ꧅ꦭꦤ꧀ꦤꦁꦔꦤ꧀ꦤꦺꦲꦸꦭꦠꦩ꧀ꦥꦂꦩꦸꦁꦱꦏꦕꦁ꧈ꦠꦤ꧀ꦱꦃꦱꦿꦸꦢꦺꦤ꧀ꦱꦸꦫꦏ꧀ꦏꦶ꧈ꦱꦶꦤꦮꦠ꧀ꦠꦤ꧀ꦭꦸꦔ꧈ꦲꦺꦕꦲꦥꦸꦥꦸꦊꦠ꧀ꦠꦤ꧀ꦮꦢꦾꦤ꧀ꦤꦶꦫꦥꦝꦲꦗꦿꦶꦃ꧈ꦢꦸꦥꦶꦱꦸꦤ꧀ꦩꦶꦪꦠ꧀ꦏꦁꦏꦶꦂꦢꦟꦓꦓꦶꦟꦶ |
| 24 | lanangane ula tampar mung sakacang / tansah sru dèn suraki / sinawat tan lunga / eca apêpulêtan / wadyanira padha ajrih / dupi sun miyat / kang kirda Nagagini |
| ꧒꧕ | ꧅ꦠꦤ꧀ꦢꦫꦤꦱꦸꦤ꧀ꦪꦪꦶꦩꦼꦟ꧀ꦛꦁꦧꦸꦤ꧀ꦠꦭ꧈ꦲꦸꦭꦠꦩ꧀ꦥꦂꦱꦸꦤ꧀ꦲꦸꦁꦏꦶꦃ꧈ꦥꦼꦝꦺꦴꦠ꧀ꦒꦸꦭꦸꦤꦶꦫ꧈ꦔꦶꦁꦟꦓꦓꦶꦟꦶꦏꦼꦤ꧀ꦤ꧈ꦥꦼꦛꦶꦠ꧀ꦠꦺꦏꦩ꧀ꦥꦠ꧀ꦭꦸꦩꦫꦶꦱ꧀ꦲꦤꦿꦁꦭꦭꦺꦪꦤ꧀ꦱꦸꦤ꧀ꦲꦸꦮꦸꦃꦠꦤ꧀ꦲꦤꦺꦴꦭꦶꦃ |
| 25 | tan darana sun yayi mênthang buntala / ula tampar sun ukih / pêdhot gulunira / nging Nagagini kêna / pêthite kampad lumaris / anrang laleyan / sun uwuh tan anolih |
| ꧒꧖ | ꧅ꦯꦁꦢꦾꦃꦩꦠꦸꦂꦗꦼꦁꦥꦢꦸꦏꦱꦭꦃꦏꦂꦪ꧈ꦢꦢꦾꦲꦚꦸꦚꦸꦮꦤ꧀ꦤꦶ꧈ꦲꦶꦁꦮꦺꦴꦁꦥꦝꦏꦂꦰ꧈ꦱꦁꦟꦡꦫꦶꦱ꧀ꦔꦤ꧀ꦢꦶꦏ꧈ꦧꦼꦤ꧀ꦤꦼꦂꦲꦸꦗꦂꦫꦶꦫꦪꦪꦶ꧈ꦮꦼꦫꦸꦃꦲꦤ꧀ꦤꦶꦫ꧈ꦮꦲꦸꦯꦶꦟꦓꦓꦶꦟꦶ |
| 26 | sang dyah matur jêng paduka salah karya / dadya anyênyuwani / ing wong padha karsa / sang nata ris ngandika / bênêr ujarira yayi / wêruhanira / wau Si Nagagini |
| ꧒꧗ | ꧅ꦏꦁꦔꦢꦸꦮꦺꦱꦺꦴꦩꦃꦱꦶꦟꦓꦦꦿꦡꦭ꧈ꦲꦶꦏꦸꦮꦸꦱ꧀ꦩꦚ꧀ꦗꦶꦁꦢꦢꦶ꧈ꦏꦢꦁꦔꦶꦁꦱꦸꦤ꧀ꦠꦸꦮ꧈ꦠꦤ꧀ꦤꦫꦱꦫꦸꦩꦱ꧈ꦱꦸꦩꦶꦠꦿꦱꦸꦢꦫꦮꦶꦢꦶ꧈ꦱꦺꦴꦩꦃꦲꦺꦭꦩ꧀ꦧꦁ꧈ꦱꦫꦶꦭꦤ꧀ꦲꦸꦭꦕꦶꦭꦶꦏ꧀ |
| 27 | kang aduwe somah Si Nagapratala / iku wus manjing dadi / kadang ingsun tuwa / tanna rasa-rumasa / sumitra sudarawidi / somahe lambang / sari lan ula cilik |
| ꧒꧘ | ꧅ꦭꦩꦸꦤ꧀ꦲꦶꦁꦱꦸꦤ꧀ꦤꦺꦴꦫꦮꦤ꧀ꦤꦶꦲꦩꦝꦼꦩ꧀ꦩ꧈ꦩꦿꦶꦁꦲꦸꦭꦠꦩ꧀ꦥꦂꦪꦪꦶ꧈ꦮꦺꦴꦁꦔꦥꦏꦪꦺꦁꦮꦁ꧈ꦩꦺꦤ꧀ꦢꦃꦲꦤꦺꦒꦼꦝꦺꦪ꧈ꦪꦺꦤ꧀ꦮꦤ꧀ꦤꦶꦪꦱꦸꦤ꧀ꦩꦠꦺꦤ꧀ꦤꦶ꧈ꦱꦂꦥꦕꦸꦭꦶꦏ꧈ꦲꦶꦁꦏꦁꦲꦩꦗꦤꦤ꧀ꦤꦶ |
| 28 | lamun ingsun ora wani amadhêma / mring ula tampar yayi / wong apa kayèngwang / mendahane gêdhea / yèn wania sun matèni / sarpa culika / ingkang amajanani |
| ꧒꧙ | ꧅ꦩꦿꦶꦁꦱꦶꦏꦏꦁꦩꦁꦏꦺꦴꦤ꧀ꦤꦺꦴꦥꦔꦺꦰ꧀ꦛꦶꦤ꧀ꦤꦶꦁꦮꦁ꧈ꦩꦸꦭꦤ꧀ꦤꦺꦱꦸꦤ꧀ꦗꦼꦩ꧀ꦥꦶꦁ꧈ꦪꦱꦶꦲꦸꦭꦠꦩ꧀ꦥꦂ꧈ꦤꦔꦶꦁꦥꦩꦠꦫꦺꦁꦮꦁ꧈ꦱꦶꦟꦓꦓꦶꦟꦶꦪꦺꦤ꧀ꦥꦿꦥ꧀ꦠꦶ꧈ꦔꦂꦰꦤ꧀ꦤꦶꦁꦥꦿꦶꦪ꧈ꦮꦮꦢꦸꦭ꧀ꦔꦏꦸꦧꦼꦕꦶꦏ꧀ |
| 29 | mring si kakang mangkono pangèsthiningwang / mulane sun jêmparing / ya si ula tampar / nanging pamatarèngwang / Si Nagagini yèn prapti / ngarsaning priya / wêwadul ngaku bêcik |
| ꧓꧐ | ꧅ꦲꦔ꧀ꦭꦼꦁꦏꦫꦪꦺꦤ꧀ꦲꦠꦸꦠꦸꦂꦫꦕꦸꦭꦶꦏ꧈ꦪꦏ꧀ꦠꦶꦩꦸꦁꦲꦭꦩꦩꦶ꧈ꦏꦺꦮꦭꦥꦶꦤ꧀ꦤꦗꦂ꧈ꦪꦺꦤ꧀ꦏꦸꦫꦁꦔꦥꦫꦶꦏ꧀ꦱ꧈ꦏꦁꦟꦓꦩꦿꦶꦁꦲꦮꦏ꧀ꦩꦩꦶ꧈ꦮꦱ꧀ꦠꦸꦱꦸꦤ꧀ꦥꦼꦗꦃ꧈ꦱꦸꦩꦂꦩꦔꦺꦴꦁꦥꦿꦶꦲꦠꦶꦤ꧀ |
| 30 | anglêngkara yèn atutura culika / yakti mung ala mami / kewala pinajar / yèn kuranga pariksa / kang naga mring awak mami / wastu sun pêjah / sumarma ngong prihatin |
| ꧓꧑ | ꧅ꦯꦁꦢꦾꦃꦲꦪꦸꦏꦩꦤ꧀ꦠꦾꦤ꧀ꦔꦸꦔꦸꦤ꧀ꦲꦶꦁꦢꦿꦶꦪ꧈ꦩꦾꦂꦰꦥꦔꦤ꧀ꦢꦶꦏꦗꦶ꧈ꦏꦸꦩꦼꦩ꧀ꦧꦼꦁꦏꦁꦮꦱ꧀ꦥ꧈ꦱꦂꦪꦤꦸꦁꦏꦼꦩ꧀ꦩꦶꦥꦢ꧈ꦯꦿꦶꦟꦡꦲꦮ꧀ꦭꦱ꧀ꦤꦶꦔꦭ꧀ꦭꦶ꧈ꦢꦺꦤꦺꦯꦁꦉꦠ꧀ꦤ꧈ꦮꦱ꧀ꦥꦤꦶꦫꦢꦽꦱ꧀ꦩꦶꦗꦶꦭ꧀ |
| 31 | sang dyah ayu kamantyan ngungun ing driya / myarsa pangandikaji / kumêmbêng kang waspa / sarya nungkêmi pada / sri nata awlas ningali / dene sang rêtna / waspanira drês mijil |
