Serat Kancil
Pupuh I: Asmaradana



ꦟ꧀ꦢꦏꦱ꧀ꦩꦫꦤ꧀ꦟ꧀ꦢ
Kasmaran
ꦲꦶꦁꦱꦸꦤ꧀ꦩꦶꦮꦶꦠ꧀ꦠꦶꦲꦩꦸꦗꦶꦲꦤꦼꦧꦸꦠ꧀ꦤꦩꦤ꧀ꦤꦶꦁꦯꦸꦏ꧀ꦩꦏꦁꦩꦸꦫꦃꦲꦶꦁꦢꦸꦤ꧀ꦚꦩꦁꦏꦺꦏꦁꦔꦱꦶꦃꦢꦊꦩ꧀ꦔꦏꦺꦫꦠ꧀ꦥꦶꦟꦸꦗꦶꦢꦠꦤ꧀ꦥꦼꦒꦠ꧀ꦲꦁꦒꦚ꧀ꦗꦂꦮꦺꦴꦁꦏꦮ꧀ꦭꦱ꧀ꦲꦪꦸꦤ꧀ꦔꦥꦸꦫꦱꦏꦺꦃꦲꦶꦁꦢꦺꦴꦱ
1// Ingsun miwiti amuji / anebut namaning Sukma / kang murah ing dunya mangke / kang asih dalem akerat / pinuji datan pegat / angganjar wong kawlas ayun / ngapura sakehing dosa /
ꦱꦏ꧀ꦮꦸꦱ꧀ꦱꦺꦩꦸꦗꦶꦲꦾꦁꦮꦶꦢꦶꦲꦩꦸꦗꦶꦟꦨꦶꦩꦸꦏ꦳ꦩ꧀ꦩꦠ꧀ꦏ꧀ꦭꦮꦤ꧀ꦏꦮꦸꦭꦮꦂꦒꦤ꧀ꦤꦺꦱꦼꦏꦧꦠ꧀ꦱꦼꦏꦮꦤ꧀ꦤꦶꦏꦧꦸꦧꦏꦂꦏ꧀ꦭꦮꦤ꧀ꦔꦸꦩꦂꦔꦸꦱ꧀ꦩꦤ꧀ꦔꦭꦶꦗꦁꦏꦼꦥ꧀ꦥꦶꦥꦸꦤ꧀ꦥꦸꦤꦶꦏꦏꦁꦏꦮꦂꦟꦲ
2// Sakwuse muji Hyang Widi / amuji Nabi Mukhammat / klawan kawulawargane / sekabat sekawan ika / Bubakar klawan Ngumar / Ngusman Ngali jangkepipun / punika kang kawarnaa /
ꦕꦫꦶꦪꦺꦴꦱ꧀ꦱꦶꦥꦸꦤ꧀ꦱꦿꦠ꧀ꦏꦚ꧀ꦕꦶꦭ꧀ꦤꦭꦶꦏꦲꦮꦶꦠ꧀ꦲꦚꦼꦫꦠ꧀ꦗꦩ꧀ꦱꦔꦲꦶꦚ꧀ꦗꦶꦁꦮꦚ꧀ꦕꦶꦤ꧀ꦤꦺꦮꦸꦭꦤ꧀ꦧꦼꦱꦂꦩꦺꦴꦁꦱꦝꦼꦱ꧀ꦛꦥꦶꦁꦠꦶꦒꦁꦢꦱꦠꦁꦒꦭ꧀ꦚꦠꦲꦸꦤ꧀ꦗꦺꦱꦁꦏꦭꦤ꧀ꦤꦶꦥꦸꦤ꧀ꦔꦸꦩ꧀ꦧꦫꦠꦿꦶꦟꦓꦫꦗ
3// Cariyosipun srat kancil / nalika awit anyerat / jam sanga injing wancine / wulan Besar mangsa Dhestha / ping tigang dasa tanggalnya / tahun Je sangkalanipun / ngumbara tri naga raja /
ꦮꦺꦴꦤ꧀ꦢꦺꦤꦺꦲꦶꦁꦏꦁꦲꦤꦸꦭꦶꦱ꧀ꦭꦫꦺꦤꦺꦩ꧀ꦏꦮꦼꦭꦱ꧀ꦱꦂꦱꦲꦶꦁꦯꦸꦫꦟꦡꦤ꧀ꦮꦶꦱ꧀ꦩꦤ꧀ꦤꦺꦏꦼꦏꦱꦶꦃꦏꦶꦫꦟꦩꦸꦝꦲꦧ꧀ꦢꦶꦢꦊꦩ꧀ꦗꦸꦫꦸꦱꦿꦠ꧀ꦔꦪꦺꦴꦒꦾꦏꦂꦡꦢꦶꦒ꧀ꦧꦾꦤꦸꦁꦩꦸꦂꦪꦤ꧀ꦤꦶꦲꦸꦢꦪꦺꦁꦱꦱ꧀ꦠꦿ
4// Wondene ingkang anulis / lare nem kawelas arsa / ing Suranatan wismane / kekasih Ki Rana Mudha / abdi dalem juru srat / Ngayogyakarta dibya nung / muryani udayeng sastra /
ꦱꦩ꧀ꦥꦸꦤ꧀ꦲꦗꦿꦶꦃꦲꦩꦲꦺꦴꦤ꧀ꦤꦶꦱꦼꦏꦺꦃꦲꦺꦏꦁꦱꦩꦾꦩꦕꦭꦤ꧀ꦏꦁꦲꦩꦶꦪꦂꦱꦏꦏꦺꦪꦺꦤ꧀ꦏꦶꦫꦁꦱꦱ꧀ꦠꦿꦩꦾꦁꦏꦶꦛꦭ꧀ꦲꦶꦁꦒꦶꦃꦢꦺꦤ꧀ꦲꦺꦴꦮꦃꦲꦤꦏꦁꦚꦼꦫꦠ꧀ꦢꦂꦩꦲꦟꦸꦫꦸꦤ꧀ꦱꦩ꧀ꦥꦸꦤ꧀ꦏꦶꦫꦁꦥꦔꦒ꧀ꦱꦩ
5// Sampun ajrih amaoni / sekehe kang samya maca / lan kang amiyarsakake / yen kirang sastra myang kithal / inggih denowahana / kang nyerat darma anurun / sampun kirang pangaksama /
ꦏꦁꦏꦶꦤ꧀ꦤꦂꦪꦕꦿꦶꦠꦫꦸꦩꦶꦪꦶꦤ꧀ꦮꦺꦴꦤ꧀ꦠꦼꦤ꧀ꦱꦠꦸꦁꦒꦶꦭ꧀ꦭꦶꦁꦏꦺꦮꦤ꧀ꦏꦼꦏꦱꦶꦃꦚꦩꦕꦤ꧀ꦒꦺꦩ꧀ꦧꦺꦴꦁꦮꦚ꧀ꦕꦶꦢꦭꦸꦭꦒꦾꦟꦺꦟ꧀ꦢꦿꦭꦗꦼꦁꦒꦝꦃꦱꦸꦩ꧀ꦥꦼꦤ꧀ꦤꦤ꧀ꦩꦔꦤ꧀ꦏꦶꦢꦁꦲꦶꦩ꧀ꦥꦺꦤ꧀ꦤꦶꦥꦸꦤ꧀ꦫꦲꦺꦴꦱ꧀ꦱꦺꦏꦭꦁꦏꦸꦁꦤꦶꦏ꧀ꦩꦠ꧀
6// Kang kinarya crita rumiyin / wonten satunggiling kewan / kekasihnya Macan Gembong / wanci dalu lagya nendra / lajeng gadhah sumpenan / mangan kidang impenipun / raose kalangkung nikmat /